الرسالة موقع إخباري متنوع
مقالات مشابهة
لما سألوا رئيس إيران السابق “أحمدي نجاد”: هو إزاي الموساد مخترقكم كدا؟ الرد كان أغرب من الخيال! نجاد قالهم إنهم عملوا وحدة مخصوص عشان تطارد جواسيس الموساد، والمفاجأة كانت إن “رئيس الوحدة” نفسه طلع هو الجاسوس الكبير لتل أبيب! يعني حرفياً “الحامي بقى هو الحرامي”.طب إزاي قدروا يوصلوا لـ “علي خامنئي” في قلب طهران وبالدقة دي؟ صحيفة “فايننشال تايمز” نشرت تحقيق يوقف شعر الرأس. الموضوع مكنش صدفة، دي شبكة استخبارات اتبنت على مدار سنين.تخيل إن إسرائيل قدرت تخترق “كاميرات المرور” في شوارع طهران كلها! وأهم كاميرا كانت في شارع “باستور” (المربع الأمني الحساس). الكاميرا دي كانت بالنسبة لضباط الموساد “كنز معلومات”، بيراقبوا منها روتين الحراس، السواقين، ومواعيد دخول وخروج القيادات الكبيرة بالثانية.الموضوع مكنش مجرد صور، دول عملوا حاجة اسمها “خريطة حياة”. بالخوارزميات والذكاء الاصطناعي، رسموا حياة كل واحد حوالين المرشد: ساكن فين؟ بيركب مع مين؟ بيفطر الساعة كام؟ لدرجة إن مسؤول إسرائيلي قال: “كنا عارفين شوارع طهران زي ما عارفين شوارع القدس بالظبط”.الخطة كانت مرسومة وجاهزة على الرف من شهور، ومستنيين “الغلطة”. يوم السبت، جاسوس بعت “تأكيد” للمخابرات المركزية الأمريكية إن فيه اجتماع كبير هيضم خامنئي مع القيادات العليا. هنا إسرائيل وأمريكا خدوا القرار: “دلوقتي أو مفيش”.التقدير كان إن تصفية الروس الكبيرة قبل ما المواجهة الرسمية تبدأ أسهل بكتير من مطاردتهم وهما مستخبيين. والمفاجأة إن خامنئي يومها مكنش في “المخبأ الحصين” بتاعه تحت الأرض، ولو كان فيه، مكنتش المقذوفات هتقدر توصله.. لكن “القدر” والروتين المكشوف هما اللي جابوه.سيما شاين” (مسؤولة سابقة في الموساد) لخصت الموضوع بمثل عبري بيقول: “الأكل بيفتح الشهية”، ومعناه إن إسرائيل بعد 7 أكتوبر بقت أجرأ بكتير ومبقتش تعمل حساب لـ “خطوط حمراء”.وقبل ما الطيارات تتحرك، إسرائيل عملت “حركة صايعة”.. عطلت 12 برج اتصالات حوالين منطقة العملية، فخلو التليفونات تظهر “مشغولة” عشان مفيش حد من الحراس يلحق يبعت تحذير أو يطلب نجدة.وفي الآخر، “ترامب” أدا الأمر المباشر، وأمريكا قامت بالواجب وزيادة؛ هجمات “سيبرانية” شلت الرادارات والاتصالات الإيرانية تماماً، وفتحت الطريق للطيارات الإسرائيلية عشان تنفذ الضربة .
